ਭਾਜਪਾ ਦੇ ਕੱਟੜ ਸਿੱਖ ਅਤੇ ਮੁਸਲਿਮ ਵਿਰੋਧੀ ਆਗੂਆਂ ਦਾ ਅਨੰਦਪੁਰ ਸਾਹਿਬ ਪਹੁੰਚਣ ‘ਤੇ ਸਿੱਖ ਕੌਮ ਸਮੂਹਿਕ ਤੌਰ ‘ਤੇ ਵਿਰੋਧ ਕਰੇ:ਮਾਨ
-ਮਾਨ ਸਾਹਿਬ, ਇਸ ਵਿਰੋਧ ਦਾ ਮਤਲਬ ਹੈ ? ਮੁੱਖ ਮੰਤਰੀ ਸ: ਬਾਦਲ ਵਾਲਾ ਅੰਦਾਜ਼ਨ 4 ਦਹਾਕੇ ਪਹਿਲਾਂ ਵਾਪਰਿਆ ਵਿਸਾਖੀ ਵਾਲਾ ਨਿਰੰਕਾਰੀ ਕਾਂਡ

ਹਿਲਰੀ ਨੇ ਨਿਊਯਾਰਕ ਤੋਂ ਕੀਤੀ ਆਪਣੇ ਚੋਣ ਪ੍ਰਚਾਰ ਦੀ ਸ਼ੁਰੂਆਤ
-ਜਿਸ ਰਾਹੀਂ ਹਿਲਰੀ ਕਰ ਰਹੀ ਹੈ ਵਿਰੋਧੀਆਂ ਨੂੰ ਮਾਤ ਪਾਉਣ ਦੀ ਬਾਤ

ਖੇਤੀਬਾੜੀ ਮੰਤਰੀ ਜਥੇਦਾਰ ਤੋਤਾ ਸਿੰਘ ਵਲੋਂ ਐਗਰੀਕਲਚਰਲ ਯੂਨੀਵਰਸਿਟੀ ਵਿਖੈ ਫੂਡ ਇੰਡਸਟਰੀ ਸੈਂਟਰ ਦਾ ਉਦਘਾਟਨ
-ਕਿਤੇ ਇਸ ਫੂਡ ਇੰਡਸਟਰੀ ਸੈਂਟਰ ਦਾ ਫੂਡ ਮੈਗੀ ਵਰਗਾ ਤਾਂ ਨਹੀਂ ਹੋਵੇਗਾ?

ਅਪਰਾਧੀਆਂ ਅਤੇ ਮੁਜਰਿਮਾਂ ਦੀ ਮਦਦ ਕਰਨ ਵਾਲੀ ਸੁਸ਼ਮਾ ਅਤੇ ਭਾਜਪਾ ਦੇ ਕਰੂਪ ਦਾਗ਼ੀ ਚਿਹਰੇ ਖੁਦ ਬ ਖੁਦ ਸਾਹਮਣੇ ਆਉਣ ਲੱਗੇ-ਮਾਨ
-ਜੇ ਕਰੂਪ ਚੇਹਰੇ ਵਾਲਾ ਸ਼ੀਸ਼ਾ ਤੋੜਕੇ ਕਹਿੰਦਾ ਰਹੇ ਕਿ ਮੈਂ ਸੁੰਦਰ ਹਾਂ ਫਿਰ ਕੋਈ ਕੀ ਕਰ ਲਵੇਗਾ?

ਭਾਰਤ ਸਾਨੂੰ ਮਿਆਂਮਾਰ ਸਮਝਣ ਦੀ ਭੁੱਲ ਨਾ ਕਰੇ : ਪਾਕਿਸਤਾਨ
-ਇਹ ਸਿਰਫ਼ ਗਿਦੜ ਭਬਕੀਆਂ ਹੀ ਲਗਦੀਆਂ ਨੇ

ਚੀਨ ਨੇ ਅਮਰੀਕਾ ਦੇ ਲੱਖਾਂ ਕੰਪਿਊਟਰ ਹੈਕ ਕੀਤੇ
-ਫਿਰ ਉਨ੍ਹਾਂ ਰਾਹੀਂ ਅਸ਼ਲੀਲ ਫਿਲਮਾਂ ਦੇ ਸੈਂਪਲ ਚੈਕ ਕੀਤੇ

ਸੰਪਰਦਾਇਕਤਾ ਦੇ ਸੱਪ ਨੂੰ ਕੁਚਲਣ ਲਈ ਜ਼ਹਿਰ ਪੀਣ ਲਈ ਵੀ ਤਿਆਰ ਹਾਂ : ਲਾਲੂ
-ਸ਼ਰਤ ਇਹ ਹੈ ਕਿ ਜ਼ਹਿਰ ਕਿਸੇ ਭਾਰਤੀ ਕੰਪਨੀ ਵਲੋਂ ਤਿਆਰ ਕੀਤਾ ਨਕਲੀ ਜ਼ਹਿਰ ਹੋਵੇ

ਸਰਕਾਰੀ ਸਕੂਲਾਂ ‘ਚ ਗੀਤਾ ਪੜ੍ਹਾਇਆ ਜਾਣਾ ਸੰਵਿਧਾਨ ਦੀ ਉਲੰਘਣਾ
-ਹੋਰ ਪਾਓ ਭਾਜਪਾ ਨੂੰ ਵੋਟਾਂ

ਨਿਜੀ ਮੁਫ਼ਾਦਾਂ ਲਈ ਸਰਨਾ ਨੇ ਕੇਜਰੀਵਾਲ ਨੂੰ ਗੁੰਮਰਾਹ ਕੀਤਾ
-ਭਾਈ ਸਾਹਿਬ! ਸਾਰੇ ਹੀ ਨਿਜੀ ਮੁਫ਼ਾਦਾਂ ਲਈ ਮਾਰੋ ਮਾਰ ਕਰਦੇ ਫਿਰਦੇ ਨੇ। ਕਿਸੇ ਹੋਰ ਬਾਰੇ ਸੋਚਣ ਦੀ ਫੁਰਸਤ ਕਿਸਨੂੰ ਹੈ?

ਸੈਨਿਟ ਨੇ ਈਰਾਨ ‘ਤੇ ਲੱਗੀਆਂ ਪਾਬੰਦੀਆਂ ‘ਚ ਢਿੱਲ ਦੇਣ ਸਬੰਧੀ ਓਬਾਮਾ ਦਾ ਪ੍ਰਸਤਾਵ ਠੁਕਰਾਇਆ
-ਇਸਤੋਂ ਬਾਅਦ ਓਬਾਮਾ ਨੂੰ ਬੜਾ ਗੁੱਸਾ ਆਇਆ

ਅੰਤਰਰਾਸ਼ਟਰੀ ਧਾਰਮਿਕ ਕਮਿਸ਼ਨ ਨੇ ਬੀਜੇਪੀ ਸਰਕਾਰ ਦੀ ਕੀਤੀ ਸਖ਼ਤ ਆਲੋਚਨਾ
ਸ਼ਰਮ ਮਗਰ ਹਮਕੋ ਆਤੀ ਨਹੀਂ : ਬੀਜੇਪੀ

ਵਿਦਿਆਰਥਣ ਦੇ ਪਾਈ ਹੋਈ ਲੰਬੀ ਕਾਲੀ ਸਕਰਟ ਨੂੰ ਜਦੋਂ ਸਕੂਲ ਵਾਲੇ ਧਾਰਮਿਕ ਚਿੰਨ੍ਹ ਸਮਝਣਗੇ
-ਉਦੋਂ ਭਾਰਤ ‘ਚ ਪੂਰੀ ਤਰ੍ਹਾਂ ਪਾਖੰਡੀ ਸਾਧਾਂ ਸੰਤਾਂ ਦਾ ਰਾਜ ਹੋਵੇਗਾ।

ਪੰਜਾਬ ਸਰਕਾਰ ਬੰਦੀ ਸਿੰਘਾਂ ਦੀ ਅਗੇਤੀ ਰਿਹਾਈ ਦੇ ਰਾਹ ਵਿਚ ਵੱਡਾ ਰੋੜਾ
-ਹੈ ਤਾਂ ਇਹ ਪੂਰੀ ਤਰ੍ਹਾਂ ਸੱਚ, ਪਰ ਬਾਦਲ ਨੂੰ ਲਗਣਾ ਹੈ ਇਹ ਬੜਾ ਕੌੜਾ

ਹਿੰਦੁਸਤਾਨੀ ਫੌਜ ਦੇ ਜਰਨੈਲ, ਸਿੱਖ ਮਸਲਿਆਂ ਨੂੰ ਹੱਲ ਕਰਨ ਲਈ ਅੱਗੇ ਆਉਣ : ਮਾਨ
-ਮਾਨ ਸਾਹਿਬ! ਇਹ ਬਿਆਨ ਤਾਂ ਦਿਨ ‘ਚ ਸੁਪਨੇ ਵੇਖਣ ਵਰਗਾ ਹੈ।

ਹਰਿਆਣਾ ਦੇ ਮੁੱਖ ਮੰਤਰੀ ਅਤੇ ਡੀਜੀਪੀ ਨੂੰ ਤੁਰੰਤ ਕਾਰਵਾਈ ਕਰਨ ਦੀ ਕੀਤੀ ਅਪੀਲ
-ਜੇ ਪੰਜਾਬ ਦੀਆਂ ਧੀਆਂ ਬਾਦਲ ਸਰਕਾਰ ਦੇ ਰਾਜ ‘ਚ ਬੱਸਾਂ ਤੋਂ ਛਾਲਾਂ ਮਾਰਕੇ ਮਰ ਰਹੀਆਂ ਨੇ ਤਾਂ ਹਰਿਆਣਾ ਸਰਕਾਰ ਨੂੰ ਅਪੀਲ ਕਰਨੀ ਹਾਸੋਹੀਣੀ ਜਿਹੀ ਲਗਦੀ ਐ।

ਧਾਰਮਿਕ ਚਿੰਨ੍ਹਾਂ ਨੂੰ ਸਕਰਟ ‘ਤੇ ਛਾਪਣ ਵਾਲੇ ਨੇ ਮੰਗੀ ਮੁਆਫ਼ੀ
-ਤੁਹਾਨੂੰ ਤਾਂ ਮੰਨਈਏਂ ਜੇ ਬੀਬੀਆਂ ਦੀਆਂ ਇੱਜ਼ਤਾਂ ਨਾਲ ਖੇਡਣ ਵਾਲੇ ਬਾਬਿਆਂ ਤੋਂ ਮੁਆਫ਼ੀ ਮੰਗਵਾਓ

ਮਾਰਿਆ ਗਿਆ ਆਈਐਸ ਮੁੱਖੀ ਬਗ਼ਦਾਦੀ: ਈਰਾਨੀ ਰੇਡੀਓ
-ਜੇ ਉਨ੍ਹਾਂ ਨੂੰ ਹਥਿਆਰ ਇੰਝ ਹੀ ਮਿਲਦੇ ਰਹੇ ਤਾਂ ਕੋਈ ਹੋਰ ਉਠ ਖੜਾ ਹੋਊ।

ਸੂਟ-ਬੂਟ ਵਾਲੀ ਨਹੀਂ ਸੂਝ ਬੂਝ ਵਾਲੀ ਸਰਕਾਰ: ਜੇਟਲੀ
-ਇਸਨੂੰ ਕਹਿੰਦੇ ਨੇ ਆਪਣੇ ਮੂੰਹ ਮੀਆਂ ਮਿੱਠੂ ਬਣਨਾ

ਮੇਕ ਇਨ ਇੰਡੀਆ਼ : ਕਿੰਨੀ ਹਕੀਕਤ, ਕਿੰਨਾ ਫਸਾਨਾ
-ਇੰਜ ਕਹਿਕੇ ਮੋਦੀ ਨੇ ਲੋਕਾਂ ਨੂੰ ਗੱਲੀਂ ਬਾਤੀਂ ਹੈ ਟਰਕਾਣਾ

ਬਾਦਲ ਦਲ ਅਤੇ ਬੀਜੇਪੀ ਦੇ ਰਿਸ਼ਤਿਆਂ ‘ਚ ਵੱਧ ਰਹੀ ਹੈ ਕੁੜਤੱਣ
-ਚੋਣਾਂ ਵੇਲੇ ਦੋਵਾਂ ਨੇ ਫਿਰ ਤੋਂ ਘਿਓ ਖਿਚੜੀ ਹੋ ਜਾਣੈ

ਬਹਿਸ ਤੋਂ ਭੱਜਣ ਦੇ ਬਹਾਨੇ ਲੱਭ ਰਹੇ ਹਨ ਸਰਨਾ ਭਰਾ-ਸਿਰਸਾ
-ਸੋਚਦੇ ਹੋਣੇ ਨੇ, ਕਿਹੜਾ ਬਹਿਸ ਕੀਤਿਆਂ ਫਿਰ ਪ੍ਰਧਾਨਗੀ ਮਿਲ ਜਾਣੀ ਏ?

ਮੋਦੀ ਦੇ ਕੋਲ ਤਾਂ ਦਿਮਾਗ਼ ਹੀ ਨਹੀਂ-ਮਮਤਾ
-ਜੇ ਜਨਤਾ ਪਹਿਲਾਂ ਸੋਚ ਲੈਂਦੀ ਤਾਂ ਇਹ ਕਹਿਣ ਦੀ ਨੌਬਤ ਨਾ ਆਉਂਦੀ

ਜੰਤਰ ਮੰਤਰ ‘ਤੇ ਦਿੱਲੀ ਕਮੇਟੀ ਵਲੋਂ ਰੋਜ਼ਾਨਾ ਪੱਧਰੀ ਲੰਗਰ ਸੇਵਾ ਦੀ ਸ਼ੁਰੂਆਤ
-ਜਿਹੜੇ ਭੁੱਖ ਹੜਤਾਲ ਕਰਦੇ ਨੇ ਕੀ ਉਹ ਵੀ ਤੁਹਾਡਾ ਲੰਗਰ ਛੱਕਣਗੇ?

ਕੋਰਟ ਨੇ ਮੁਹੰਮਦ ਸਦੀਕ ਦੀ ਵਿਧਾਨ ਸਭਾ ਦੀ ਮੈਂਬਰਸ਼ਿਪ ਰੱਦ ਕੀਤੀ
-ਹੁਣ ਇਹ ਨਾ ਪੁਛਿਓ ਕਿ ਸਦੀਕ ਦੇ ਮਨ ‘ਤੇ ਕੀ ਬੀਤੀ

ਫਰਾਂਸ ਨੇ ਬੇਹੱਦ ਪਤਲੀਆਂ ਮਾਡਲਾਂ ‘ਤੇ ਰੋਕ ਲਗਾਈ
-ਇਸ ਤੋਂ ਬਾਅਦ ਮੋਟੀਆਂ ਮਾਡਲਾਂ ਨੂੰ ‘ਕੈਟ ਵਾਕ’ ਦੀ ਪ੍ਰੈਕਟਿਸ ਕਰਾਈ

ਹੁਣ ਪੰਜ ਸਾਲ ‘ਚ ਹੋਵੇਗਾ ਕੇਸਾਂ ਦਾ ਨਿਪਟਾਰਾ: ਮੁੱਖ ਜੱਜ ਦਤੂ
- ਇਹ ਸੱਚ ਨਹੀਂ ਇਹ ਹੈ ਜਾਂ ਫਿਰ ਇਕ ਲਾਰਾ

ਅਡਵਾਨੀ ਨੂੰ ਬੀਜੇਪੀ ਦੇ ਸਥਾਪਨਾ ਦਿਵਸ ਸਮਾਗਮ ‘ਚ ਬੁਲਾਇਆ ਹੀ ਨਹੀਂ ਗਿਆ
- ਚਲੇ ਹੋਏ ਕਾਰਤੂਸ ਨੂੰ ਨਾ ਸੱਦਕੇ, ਬੀਜੇਪੀ ਨੂੰ ਕੋਈ ਫ਼ਰਕ ਨਹੀਂ ਪਿਆ

ਧੂਰੀ ਦੀਆਂ ਜਿ਼ਮਨੀ ਚੋਣਾਂ 2017 ਲਈ ਜ਼ਮੀਨ ਤਿਆਨ ਕਰਨਗੀਆਂ: ਕੈਪਟਨ
-ਹਵਾਈ ਫਾਇਰ ਨਾ ਕਰੀ ਜਾਓ, ਕੋਈ ਮਜ਼ਬੂਤ ਜ਼ਮੀਨ ਤਿਆਰ ਕਰਕੇ ਸਾਹਮਣੇ ਆਓ।

ਡੀ ਡੀ ਏ ਦੀ ਕਾਰਵਾਈ ਦੌਰਾਨ ਸਿੱਖ ਪਰਿਵਾਰਾਂ ਨਾਲ ਹੋਏ ਧੱਕੇ ਦੇ ਖਿਲਾਫ਼ ਦਿੱਲੀ ਕਮੇਟੀ ਹੋਈ ਸਰਗਰਮ
-ਇਹ ਸੱਚ ਹੈ ਜਾਂ ਫਿਰ ਸਾਡਾ ਹੈ ਕੋਰਾ ਭਰਮ

ਬਾਦਲ ਪੰਜਾਬ ਦੇ ਦਰਿਆਈ ਪਾਣੀਆਂ ਦੀ ਵੰਡ ਦੇ ਮਾਮਲੇ ‘ਤੇ ਸਥਿਤੀ ਸਪੱਸ਼ਟ ਕਰਨ
-ਕਿਥੇ ਫਿਰਦੇ ਹੋ ਕਪੂਰੀ ਦੇ ਮੋਰਚੇ ਤੋਂ ਲੈਕੇ ਹੁਣ ਤੱਕ ਤੁਹਾਨੂੰ ਹੀ ਸਥਿਤੀ ਸਪੱਸ਼ਟ ਨਹੀਂ ਹੋਈ?

ਮੁਲਾਇਤ ਯਾਦਵ ਹੋਣਗੇ ਸਾਡੇ ਸਭ ਦੇ ਨੇਤਾ-ਲਾਲੂ
ਲਾਲੂ ਜੀ,ਇਹ ਭਾਈਵਾਲੀ ਕਦੋਂ ਤੱਕ ਨਿਭੇਗੀ

ਅਸੀਂ ਜੁਮਲੇ ਨਹੀਂ ਕਹਿੰਦੇ-ਵਾਅਦੇ ਪੂਰੇ ਕਰਦੇ ਹਾਂ-ਕੇਜਰੀਵਾਲ
-ਨਾ ਹੀ ਅਸੀਂ 0 ਸੀਟਾਂ ਵਾਲੀ ਕਾਂਗਰਸ ਅਤੇ 3 ਸੀਟਾਂ ਵਾਲੀ ਭਾਜਪਾ ਤੋਂ ਡਰਦੇ ਹਾਂ।

ਦੀਦਾਰ ਸਿੰਘ ਬੈਂਸ ਦਾ ਦਿੱਲੀ ਕਮੇਟੀ ਨੇ ਕੀਤਾ ਸਵਾਗਤ
-ਇਹ ਤਾਂ ਕਈ ਸਾਲ ਪਹਿਲਾਂ ਹੋ ਜਾਣਾ ਚਾਹੀਦਾ ਸੀ। ਚਲੋ! ਦੇਰ ਆਏ ਦਰੁਸਤ ਆਏ।

-ਸੁਖਦੇਵ ਸਿੰਘ ਢੀਂਡਸਾ ਦੇ ਬੋਲਣ ਸਮੇਂ ਬੇਰੁਜ਼ਗਾਰ ਲਾਇਨਮੈਨਾਂ ਨੇ ਬੋਲਿਆ ਹੱਲਾ।
*ਹੋਰ ਵਿਚਾਰੇ ਕਰਨ ਵੀ ਕੀ?

-ਕ੍ਰਿਕਟ: ਤੀਜਾ ਵਨ ਡੇਅ ਮੈਚ ਭਾਰਤ ਨੇ ਜਿੱਤਿਆ।
*ਵੇਖੋ ਬਾਕੀ ਰਹਿੰਦੇ ਦੋ ਮੈਚਾਂ ਵਿਚ ਕੀ ਬਿੱਲੀ ਬਾਘਦੀ ਹੈ?

-ਕਾਂਗਰਸ ਨੇ ਰਾਹੁਲ ਨੂੰ ਬਣਾਇਆ ਵਾਈਸ ਪ੍ਰੈਜ਼ੀਡੈਂਟ
*ਜਿਵੇਂ ਸ: ਬਾਦਲ ਆਪਣੇ ਬੇਟੇ ਸੁਖਬੀਰ ਨੂੰ ਪੌੜੀ ਦਾ ਇਕ ਇਕ ਡੰਡਾ ਚੜ੍ਹਾਕੇ ਸਿਆਸਤ ਸਿਖਾ ਰਹੇ ਨੇ, ਸੋਨੀਆਂ ਵੀ ਇਵੇਂ ਹੀ ਕਰ ਰਹੀ ਹੈ।

-ਰਵੀ ਬਾਲੀ ਮਾਮਲੇ ‘ਚ ਪੁਲਿਸ ਨੂੰ ਪਈ ਫਟਕਾਰ ਨਹੀਂ ਮਿਲਿਆ ਰਿਮਾਂਡ
*ਸਿੱਧਾ ਕਹੋ ਨਾ ਰਵੀ ਬਾਲੀ ਪੁਲਿਸ ਤਸ਼ਦੱਦ ਤੋਂ ਬੱਚ ਗਿਆ।

-ਕਿਸੇ ਨਾ ਲਈ ਸ਼ਹੀਦ ਸੇਵਾ ਸਿੰਘ ਦੇ ਪਿੰਡ ਠੀਕਰੀਵਾਲ ਦੀ ਸਾਰ
*ਦੱਸੋ ਪਿਆਰਿਓ! ਸਾਡੇ ਲੀਡਰ ਜੇਬਾਂ ਭਰਨ ਜਾਂ ਸ਼ਹੀਦਾਂ ਦੀ ਸਾਰ ਲੈਣ?

-ਮਜੀਠੀਏ ਦੇ ਖ਼ਿਲਾਫ਼ ਕੇਸ ਦਰਜ ਕੀਤਾ ਜਾਵੇ
*ਜਬ ਜੀਜਾ ਭਏ ਉੱਪ ਮੁੱਖ ਮੰਤਰੀ ਤੋਂ ਡਰ ਕਾਹੇ ਕਾ

-57 ਦਿਨਾਂ ਤੋਂ ਪੀ.ਈ.ਯੂ ਦੇ ਮੁਲਾਜ਼ਮਾਂ ਦਾ ਸੰਘਰਸ਼ ਜਾਰੀ ਚਾਰ ਕਿਸਾਨ ਜਥੇਬੰਦੀਆਂ ਵਲੋਂ ਸੰਘਰਸ਼ ਦੀ ਪੂਰਨ ਹਿਮਾਇਤ
*ਸੰਘਰਸ਼ ਕਰਨ ਵਿਚ ਕੋਈ ਹਰਜ਼ ਨਹੀਂ। ਠੰਡ ਦੇ ਮੌਸਮ ‘ਚ ਅਕਾਲੀ ਸਰਕਾਰ ਦੀਆਂ ਡਾਂਗਾਂ ਤੋਂ ਬਚਕੇ ਰਿਹੋ।

-ਬਰਨਾਲਾ ਸਾਹਿਬ ਨੇ ਸੱਚ ਬਿਆਨ ਕਰਕੇ ਸ਼ਲਾਘਾਯੋਗ ਉੱਦਮ ਕੀਤਾ, ਪਰ ਅੱਧਾ ਸੱਚ ਛੁਪਾ ਲਿਆ: ਮਾਨ
*ਦੱਸੋ ਮਾਨ ਸਾਹਿਬ! ਕਿਹੋ ਜਿਹੀਆਂ ਭੋਲੀਆਂ ਗੱਲਾਂ ਕਰ ਰਹੇ ਜੇ, ਬਾਕੀ ਅੱਧਾ ਸੱਚ ਦੱਸਿਆਂ ਆਪਣੇ ਭੇਤ ਵੀ ਤਾਂ ਸਾਹਮਣੇ ਆ ਜਾਣੇ ਸਨ।

-ਪੁਲਿਸ ਸੁਰੱਖਿਆ ਮਹੱਤਵਪੂਰਣ ਸੰਵਿਧਾਨਿਕ ਅਹੁਦੇਦਾਰਾਂ ਨੂੰ ਹੀ ਮਿਲਣੀ ਚਾਹੀਦੀ ਹੈ : ਸੁਪਰੀਮ ਕੋਰਟ
*ਫਿਰ ਸੰਵਿਧਾਨਿਕ ਅਹੁਦੇਦਾਰਾਂ ਦੇ ਚਮਚਿਆਂ ਤੇ ਝੋਲੀ ਚੁੱਕਾਂ ਦਾ ਕੀ ਬਣੂੰਗਾ?

-ਜ਼ਮੀਰ ਵੇਚਣ ਵਾਲੇ ਕੇਵਲ ਅਕਾਲੀ ਦਲ ਬਾਦਲ ਵਿੱਚ ਹੀ ਹਨ
*ਹਾਂ ਭਾਈ ਸਾਹਿਬ! ਗੱਲ ਤਾਂ 16 ਆਨੇ ਸੱਚ ਕਹੀ ਜੇ, ਬਾਕੀ ਤਾਂ ਸਾਰੇ ਦੁੱਧ ਧੋਤੇ ਨੇ।

-ਭਰਤੀ ਘਪਲੇ ‘ਚ ਓਮ ਪ੍ਰਕਾਸ਼ ਚੌਟਾਲਾ ਸਾਥੀਆਂ ਸਮੇਤ ਗ੍ਰਿਫਤਾਰ
*ਲਵੋ ਜੀ ਇਕ ਹੋਰ ਦੁੱਧ ਧੋਤਾ ਗ੍ਰਿਫਤਾਰ ਹੋ ਗਿਆ ਜੇ! ਇਹ ਤਾਂ ਸੋਹਣੀ ਤੁੱਕ ਬੰਦੀ ਹੋ ਗਈ:
“ਚੋਟਾਲਾ ਕਾ ਘੋਟਾਲਾ”

-ਜ਼ਰਦਾਰੀ ਸਰਕਾਰ ਦੇ ਖ਼ਿਲਾਫ਼ ਕਾਦਰੀ ਦੀ ਅਗਵਾਈ ‘ਚ ਵਿਰੋਧ ਪ੍ਰਦਰਸ਼ਨ
*ਲੱਗਦੈ ਜਨਾਬ ਕਾਦਰੀ ਨੂੰ ਨਵਾਂ-ਨਵਾਂ ਸਿਆਸਤ ਦਾ ਬੁਖ਼ਾਰ ਚੜ੍ਹਿਐ?

-ਵਿਲੇਨ ਦੀ ਜ਼ਿੰਦਗ਼ੀ ਵਧੀਆ ਹੁੰਦੀ ਹੈ-ਰਣਬੀਰ
*ਵੇਖ ਲੈ ਬੱਚੂ! ਵਿਲੇਨ ਨੂੰ ਕੁਟਾਪਾ ਵੀ ਚੜ੍ਹਦਾ ਹੁੰਦਾ ਹੈ

-ਨੋ ਕਿਸਿੰਗ:ਨੋ ਬਿਕਨੀ-ਸੋਨਾਕਸ਼ੀ
*ਜਦੋਂ ਤੱਕ ਫ਼ਿਲਮਾਂ ਮਿਲਣੀਆਂ ਘੱਟ ਨਹੀਂ ਜਾਂਦੀਆਂ

-ਪੰਜਾਬ ਸਰਕਾਰ ਸਾਹਿਤਕਾਰਾਂ ਨੂੰ ਪੂਰਾ ਮਾਣ ਸਨਮਾਨ ਦੇਵੇਗੀ: ਜੀ ਕੇ ਸਿੰਘ
*ਅਤੇ ਐਵਾਰਡ ਉਨ੍ਹਾਂ ਨੂੰ ਦੇਵੇਗੀ ਜਿਹੜੇ ਲਿਖਾਰੀ ਸਰਕਾਰ ਦਾ ਪਾਣੀ ਭਰਦੇ ਨੇ

-ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਸਾਨੂੰ ਕੁਦਰਤੀ ਸੋਮਿਆਂ ਦੀ ਵਰਤੋਂ ਸੰਜਮ ਨਾਲ ਕਰਨੀ ਚਾਹੀਦੀ ਹੈ-ਸ:ਭੂੰਦੜ
*ਜਿਵੇਂ ਸਾਡੇ ਲੀਡਰ ਆਪਣੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਧਨ ਇਕੱਠਾ ਕਰਨ ਵਿਚ ਲੱਗੇ ਹੋਏ ਹਨ।

-ਬਲਿਊ ਸਟਾਰ ਦੇ ਸ਼ਹੀਦਾਂ ਦੀ ਯਾਦਗਾਰ ਦਾ ਕੰਮ ਆਖ਼ਰੀ ਪੜਾਅ ‘ਚ
*28 ਸਾਲਾਂ ਬਾਅਦ ਬਣਨ ਵਾਲੀਆਂ ਇਨ੍ਹਾਂ ਯਾਦਗਾਰਾਂ ਦੇ ਨਾਮ ‘ਤੇ ਫਿਰ ਚੰਡੀਗੜ੍ਹ ਪੰਜਾਬ ਨੂੰ ਦਿਵਾਉਣ ਵਰਗੀ ਰਾਜਨੀਤੀ ਖੇਡੀ ਜਾਵੇਗੀ।

-ਧਰਮ ਪ੍ਰਚਾਰ ਲਹਿਰ ਦੀ ਪ੍ਰਚਾਰ ਹਨੇਰੀ ਦੇ ਸਾਰਥਕ ਨਤੀਜੇ ਨਿਕਲ ਰਹੇ ਹਨ-ਜਥੇ: ਅਵਤਾਰ ਸਿੰਘ
*ਤਾਹੀਉਂ, ਪੰਜਾਬ ਵਿਚ ਸਿੱਖ ਬੱਚੇ ਬੱਚੀਆਂ ਕੇਸ ਕਤਲ ਵੱਡੀ ਪੱਧਰ ‘ਤੇ।

-ਰਾਮਦੇਵ ਦੇ ਆਸ਼ਰਮ ਦੇ 6 ਪ੍ਰੋਡਕਟਸ ਦੇ ਨਮੂਨੇ ਫੇਲ੍ਹ
*ਉਹਨੇ ਕਿਹੜੀ ਡਾਕਟਰੇਟ ਦੀ ਡਿਗਰੀ ਲਈ ਹੋਈ ਹੈ। ਨਮੂਨੇ ਫੇਲ੍ਹ ਨਾ ਹੋਣ ਤਾਂ ਹੋਰ ਕੀ ਹੋਵੇ।

-ਵਾਲਮਾਰਟ ਜਲਦੀ ਖੋਲ੍ਹ ਰਿਹਾ ਹੈ ਭਾਰਤ ‘ਚ ਸਟੋਰ
*ਇਸੇ ਖੁਸ਼ੀ ਵਿਚ ਭਾਜਪਾ ਕਰ ਰਹੀ ਹੈ ਬੰਦ ਹੋਰ ਅਤੇ ਹੋਰ

-ਲੋਕ ਵਿਰੋਧੀ ਧਿਰਾਂ ਦੇ ਗੁੰਮਰਾਹਕੁਨ ਪ੍ਰਚਾਰ ਤੋਂ ਦੂਰ ਰਹਿਣ-ਪ੍ਰਧਾਨ ਮੰਤਰੀ
*ਅਤੇ ਕਾਂਗਰਸ ਦੀ ਜ਼ਿੰਦਾਬਾਦ, ਜ਼ਿੰਦਾਬਾਦ ਕਹਿਣ।

-ਰੋਮਨੀ ਨੇ ਜਾਰੀ ਕੀਤੀ ਟੈਕਸ ਰਿਟਰਨ ਰਿਪੋਰਟ
*ਹੁਣ ਮੰਗ ਰਿਹਾ ਹੈ ਲੋਕਾਂ ਤੋਂ ਵੋਟ

-ਖੁਲ੍ਹ ਸਕਦੇ ਹਨ, ਜ਼ਰਦਾਰੀ ਦੇ ਖਿਲਾਫ਼ ਭ੍ਰਿਸ਼ਟਾਚਾਰ ਦੇ ਕੇਸ
*ਇਸਤੋਂ ਬਾਅਦ ਦੋਸ਼ੀ ਹੋਣ ਦੀ ਸੂਰਤ ਵਿਚ ਭੱਜ ਸਕਦੈ ਵਿਦੇਸ਼

-ਮਲਟੀ ਬਰੈਂਡ ਰੀਟੇਲ ‘ਚ 51 ਫ਼ੀਸਦੀ ਐਫ਼ਡੀਆਈ ਨੂੰ ਮਿਲੀ ਕੈਬਨਿਟ ਵਲੋਂ ਹਰੀ ਝੰਡੀ
*ਭਾਜਪਾ ਨੇ ਕਾਂਗਰਸ ਦੀਆਂ ਜੜ੍ਹਾਂ ਵੱਢਣ ਲਈ ਫਿਰ ਤੋਂ ਦਾਤਰੀ ਚੰਡੀ

-ਰਣੀਕੇ ਦੇ ਪੁੱਤਰ ‘ਤੇ ਵੀ ਘੋਟਾਲੇ ਕਰਨ ਦੇ ਆਰੋਪ
*ਇਸ ਮਾਮਲੇ ‘ਚ ਅਕਾਲੀ ਦਲ ਪੂਰੀ ਤਰ੍ਹਾਂ ਖਾਮੋਸ਼

-ਸੰਸਥਾ ਨੂੰ ਕੋਸਣ ਤੋਂ ਪਹਿਲਾਂ ਹੇਰ ਆਪਣੇ ਗਿਰੇਬਾਨ ਵੱਲ ਝਾਕੇ-ਮਹਿਤਾ ਰਾਮ ਸਿੰਘ
*ਸਾਡੀ ਇਹੀ ਤਾਂ ਤ੍ਰਾਸਦੀ ਰਹੀ ਹੈ ਕਿ ਅਸੀਂ ਆਪਣੇ ਗਿਰੇਬਾਨ ਵੱਲ ਕਦੀ ਝਾਕਦੇ ਹੀ ਨਹੀਂ

-ਪੀਏਯੂ ਦੇ ਕਿਸਾਨ ਮੇਲੇ ਕਿਸਾਨਾਂ ਲਈ ਗਿਆਨ ਦਾ ਸੋਮਾ ਹਨ-ਬੱਬੇਹਾਲੀ
*ਪਰ ਅਸੀਂ ਇਸ ਸੋਮੇ ਚੋਂ ਇਕ ਘੁੱਟ ਪੀਣ ਲਈ ਵੀ ਰਾਜ਼ੀ ਨਹੀਂ

-ਸਾਡੇ ਵੱਲੋਂ ਪ੍ਰਗਟਾਈ ਸ਼ੰਕਾ ਗੁਰਸ਼ੇਰ ਸਿੰਘ ਸ਼ੇਰਾ ਨੂੰ ਪੁਲਿਸ ਨੇ ਮੁਕਾਬਲੇ ਵਿਚ ਨਹੀਂ, ਬਲਕਿ ਘੇਰ ਕੇ ਮਾਰਿਆ ਸੱਚ ਸਾਬਿਤ ਹੋਈ-ਮਾਨ
*ਪਹਿਲਾਂ ਇਹ ਦਸੋ ਕਿੰਨੀ ਕੁ ਨਕਲੀ ਮੁਕਾਬਲੇ ਕਰਨ ਵਾਲਿਆਂ ਨੂੰ ਹੈ ਪਹਿਲਾਂ ਸਜ਼ਾ ਹੋਈ?

-ਡੀਜ਼ਲ ਦੇ ਮੁੱਲ ਵਿੱਚ ਹੋਇਆ 5 ਰੁਪੈ ਦਾ ਵਾਧਾ
*ਇਸ ਮਹਿੰਗਾਈ ਨੇ ਲੱਕ ਭੰਨ੍ਹ ਸੁੱਟਿਆ ਹੈ ਸਾਡਾ

-ਭਾਜਪਾ ਦੀ ਕੈਗ ਨਾਲ ਮਿਲੀਭੁਗਤ – ਤਿਵਾਰੀ
*ਫਿਰ ਘੜੋ ਇਨ੍ਹਾਂ ਤੋਂ ਬਚਣ ਲਈ ਕੋਈ ਜੁਗਤ

-ਬਾਦਲ, ਭਾਜਪਾ ਅਤੇ ਜਨਸੰਘੀਆਂ ਨਾਲ ਸਾਂਝ ਪਾ ਕੇ ਸਿੱਖਾਂ ਦੀ ਵੱਖਰੀ ਪਛਾਣ ਅਤੇ ਹੋਂਦ ਖਤਮ ਕਰ ਰਿਹਾ-ਸਰਨਾ
*ਸਿੱਧਾ ਕਹੋ ਕਿ ਇਨ੍ਹਾਂ ਨੂੰ ਰੱਬ ਦਾ ਵੀ ਨਹੀਂ ਡਰ ਰਿਹਾ

-ਪਿੰਡ ਭਿੰਡਰ ਕਲਾਂ ਵਿਖੇ ਹਜ਼ਾਰਾਂ ਲੋਕਾਂ ਨੇ ਹੱਥ ਖੜ੍ਹੇ ਕਰਕੇ ਅੰਧ ਵਿਸ਼ਵਾਸ ਤਿਆਗਣ ਦਾ ਪ੍ਰਣ ਕੀਤਾ
*ਲੋਕੀਂ ਸਿਰਫ਼ ਲੀਡਰਾਂ ਵਾਂਗ ਪ੍ਰਣ ਹੀ ਕਰਦੇ ਨੇ

-ਸਭਿਆਚਾਰਕ ਅਤੇ ਨੈਤਿਕ ਕਦਰਾਂ-ਕੀਮਤਾਂ ਨੂੰ ਅਪਣਾਉਣਾ ਸਮੇਂ ਦੀ ਮੁੱਖ ਲੋੜ-ਉਰਵਿੰਦਰ ਕੌਰ ਗਰੇਵਾਲ
*ਲੋੜ ਬਾਰੇ ਤਾਂ ਸਾਨੂੰ ਵੀ ਪਤੈ ਬੀਬਾ ਜੀ, ਸਾਨੂੰ ਤਾਂ ਇਹ ਦੱਸੋ ਕਿ ਅਪਨਾਉਣੀਆਂ ਕਦੋਂ ਸ਼ੁਰੂ ਕਰਨੀਆਂ ਨੇ?

-ਖਾਣਾ ਬਣਾਉਣ ਲਈ ਸਹੀ ਤੇਲ ਅਤੇ ਚਿਕਨਾਈ ਦੀ ਵਰਤੋਂ ਕਰੋ-ਪੀ ਏ ਯੂ ਮਾਹਿਰ
*ਇਹ ਵੀ ਦੱਸ ਦਿੰਦੇ ਖਾਣਾ ਪਕਾਉਣ ਲਈ ਸਸਤਾ ਮਿੱਟੀ ਦਾ ਤੇਲ ਕਿਥੋਂ ਮਿਲਦਾ ਹੈ?

-ਕਾਂਗਰਸ ਨੇ ਸਿਰਫ਼ ਲੋਕਾਂ ਨੂੰ ਲੁਟਿਆ ਹੈ-ਬਾਦਲ
*ਅਕਾਲੀ-ਭਾਜਪਾ ਨੇ ਲੁਟਿਆ ਹੈ ਅਤੇ ਫਿਰ ਲੋਕਾਂ ਨੂੰ ਕੁਟਿਆ ਹੈ।

-ਚੋਰਾਂ ਨੇ 2 ਲੱਖ ਐਰੋ ਦੇ ਕਰੀਬ ਇਲੋਕਟ੍ਰਾਨਿਕ ਸਮਾਨ ਚੁਰਾ ਲਿਆ
*ਸਾਡਾ ਕੋਈ ਲੀਡਰ ਹੁੰਦਾ ਤਾਂ ਸਮਾਨ ਦੇ ਨਾਲ ਦੁਕਾਨ ਵੀ ਹਥਿਆ ਲੈਣੀ ਸੀ।

-ਲੋਕ ਸਾਥ ਦੇਣ ਤਾਂ ਇਸ ਵਾਰ ਵੀ ਰਾਜ ਨਹੀਂ ਸੇਵਾ ਕਰਾਂਗੇ-ਰੋਜ਼ੀ ਬਰਕੰਦੀ
*ਗਰੀਬ ਲੋਕਾਂ ਦੀ ਡਾਂਗਾਂ ਨਾਲ

-ਵਿਸ਼ਵਭਰ ਵਿੱਚ ਫਿਰ ਆਰਥਿਕ ਮੰਦੀ ਦੀ ਸੰਭਾਵਨਾ : ਵਰਲਡ ਬੈਂਕ
*ਆਰਥਕ ਮੰਦੀ ਤੋਂ ਉਭਰਨ ਦੇ ਹੱਲ ਦੱਸੋ, ਸਿਰਫ਼ ਸੰਭਾਵਾਨਾਵਾਂ ਦੱਸ ਦੱਸ ਈ ਡਰਾਈ ਜਾਵੋਗੇ

-ਯੂਥ ਵਿੰਗ ਦੇ ਵਰਕਰਾਂ ਨੇ ਮਜੀਠੀਏ ਨੂੰ ਅਸਤੀਫ਼ੇ ਭੇਜੇ
*ਜਿਨ੍ਹਾਂ ਦੀ ਧੂਣੀ ਬਾਲਕੇ ਮਜੀਠੀਏ ਨੇ ਲੋਹੜੀ ਦੀ ਅੱਗ ਸੇਕ ਲਈ

-ਪਿੰਡ ਬੀਪੁਰ ਦੇ ਕਈ ਅਕਾਲੀ ਪ੍ਰਵਾਰਾਂ ਨੇ ਕਾਂਗਰਸ ਦਾ ਹੱਥ ਫੜ੍ਹਿਆ
*ਬੰਦੇ ਤਾਂ ਉਹੀ ਨੇ ਸਿਰਫ਼ ਪੱਗ ਦਾ ਰੰਗ ਈ ਵਟਾਇਆ ਹੈ

-ਸੁਖਬੀਰ ਤੇ ਇਕ ਕਰੋੜ ਰੁਪੈ ਰਿਸ਼ਵਤ ਮੰਗਣ ਦੇ ਗੰਭੀਰ ਦੋਸ਼
*ਅਜੇਹੇ ਦੋਸ਼ ਤਾਂ ਪਿਛਲੀ ਕਾਂਗਰਸ ਸਰਕਾਰ ਨੇ ਵੀ ਲਾਏ ਸੀ ਉਨ੍ਹਾਂ ਕੀ ਵਿਗਾੜ ਲਿਆ?

-ਭਰਾ ਰਾਹੁਲ ਦੀ ਮਦਦ ਲਈ ਕੁਝ ਵੀ ਕਰਾਂਗੀ-ਪ੍ਰਿਅੰਕਾ
*ਮਾਇਆਵਤੀ ਆ ਜੇ ਭਾਵੇਂ ਉਮਾ ਭਾਰਤੀ, ਕਿਸੇ ਤੋਂ ਨਹੀਂ ਡਰਾਂਗੀ।

-ਚੋਣਾਂ ਦੌਰਾਨ ਹੋ ਸਕਦੀ ਹੈ ਵੱਡੇ ਪੱਧਰ ‘ਤੇ ਕਾਲੇ ਧੰਨ ਦੀ ਵਰਤੋਂ
*ਵਰਤੋਂ ਕਿ ਨਸ਼ੇ ਵੰਡ ਕੇ ਦੁਰਵਰਤੋਂ

-ਭਾਰਤਵਾਸੀ ਦੁੱਧ ਦੇ ਰੂਪ ਵਿੱਚ ਪੀ ਰਹੇ ਹਨ ਜ਼ਹਿਰ
*ਉਤੋਂ ਲੀਡਰ ਢਾਹ ਰਹੇ ਨੇ ਭ੍ਰਿਸ਼ਟਾਚਾਰ ਦਾ ਕਹਿਰ

-ਦਰਸ਼ਕ ਵਖਰੇ ਸਿਨੇਮਾ ਨੂੰ ਸਵੀਕਾਰ ਕਰ ਰਹੇ ਨੇ-ਰਿਤਿਕ
*ਜਿਵੇਂ ਕਿ ਡਰਟੀ ਪਿਕਚਰ

-ਅਜੇ ਸ਼ਾਦੀ ਦਾ ਇਰਾਦਾ ਨਹੀਂ-ਵਿਦਿਆ
*ਜਦੋਂ ਹੋਇਆ, ਉਦੋਂ ਤੱਕ ਤਾਂ ਛੜਿਆਂ ਦੇ ਘਰੀਂ ਦੋ ਦੋ ਜੁਆਕ ਖੇਡਦੇ ਹੋਣੇ ਨੇ।

-ਜ਼ਰਦਾਰੀ ‘ਤੇ ਅਪਰਾਧਕ ਮੁਕਦਮਾ ਨਹੀਂ ਚਲਾਇਆ ਜਾ ਸਕਦਾ
*ਕਿਉਂਕਿ ਲੀਡਰਾਂ ਨੂੰ ਤਾਂ ਸੱਤ ਖੂਨ ਮੁਆਫ਼ ਨੇ

-ਤੀਜੇ ਟੈਸਟ ਮੈਚ ‘ਚ ਵੀ ਭਾਰਤ ਨੇ ਟੇਕੇ ਗੋਡੇ
*ਹੁਣ ਤਾਂ 0-3 ਨਾਲ ਹਾਰ ਰਹੇ ਨੇ ਸ਼ੇਰ ਥੋਡੇ

-ਹਰ ਮਨੁੱਖ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਸਮਰਪਿਤ ਹੋਵੇ-ਜਥੇ: ਅਵਤਾਰ ਸਿੰਘ
*ਉਨ੍ਹਾਂ ਨੂੰ ਛੋਟ ਮਿਲੇਗੀ ਜਿਹੜਾ ਬੀਬੀ ਜਗੀਰ ਕੌਰ ਤੇ ਸ: ਬਾਦਲ ਵਾਂਗ ਗੱਦੀ ‘ਤੇ ਹੋਵੇ

-ਮਜੀਠੀਆ ਦੀ ਗੁੰਡਾਗਰਦੀ ਰੋਕਣ ਲਈ ਚੋਣ ਕਮਿਸ਼ਨਰ ਨੂੰ ਸ਼ਕਾਇਤ
*ਬਈ ਕਹਿੰਦੇ ਨੇ ਜਿਸਕੀ ਲਾਠੀ ਉਸਕੀ ਭੈਂਸ

-ਭ੍ਰਿਸ਼ਟਾਚਾਰ ਵਿਰੁੱਧ ਡੌਂਡੀ ਪਿੱਟਣ ਵਾਲੀ ਭਾਜਪਾ ਨੇ  ਭ੍ਰਿਸ਼ਟ ਮੰਤਰੀ ਟਿਕਟਾਂ ਨਾਲ ਨਿਵਾਜੇ
*ਇਹ ਡੌਂਡੀ ਤਾਂ ਸਿਰਫ਼ ਹੁਕਮਰਾਨ ਪਾਰਟੀ ਨੂੰ ਬਦਨਾਮ ਕਰਨ ਲਈ ਸੀ। ਭ੍ਰਿਸ਼ਟਾਚਾਰ ਵਿਰੁੱਧ ਨਹੀਂ ਸੀ

-ਫਰਾਂਸ ਵਿਚ ਦੁਨੀਆਂ ਦੇ ਦੂਸਰੇ ਵੱਡੇ ਮਿਊਜ਼ੀਅਮ ਨੂੰ ਵੇਖਣ ਆਏ ਲੋਕਾਂ ਦਾ ਰੀਕਾਰਡ ਟੁੱਟਿਆ
*ਉਨ੍ਹਾਂ ਨੂੰ ਕਿਹਨੇ ਕਿਹਾ ਸੀ ਕਿ ਇੰਨੀ ਭੀੜ ਵਿਚ ਰਿਕਾਰਡ ਨਾਲ ਲੈ ਕੇ ਆਉਣ

-ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਟ੍ਰੈਫਿਕ ਪੁਲਸ ਨੇ ਵਧਾਈ ਚੌਕਸੀ
*ਜਿਸ ਕਰਕੇ ਅਮਲੀਆਂ ਦੀ ਭੁੱਕੀ ਸਪਲਾਈ ਲੇਟ ਹੋਈ

-ਉਮੀਦਵਾਰਾਂ ਦੀ ਸੂਚੀ ਜਾਰੀ ਕਰਨ ਤੋਂ ਪਹਿਲਾਂ ਸੋਨੀਆਂ ਨੇ ਕੈਪਟਨ ਨਾਲ ਕੀਤੀ ਮੀਟਿੰਗ
*ਜਿਸ ਦੌਰਾਨ ਕੈਪਟਨ, ਜਗਮੀਤ ਬਰਾੜ ਅਤੇ ਬੀਬੀ ਭੱਠਲ ਦੇ ਜਾਣੂੰ ਉਮੀਦਵਾਰਾਂ ਦੀਆਂ ਸੀਟਾਂ ਦੇ ਵੇਰਵੇ ਲਏ ਗਏ

-ਵਿਗਿਆਨ ਦੇ ਖੇਤਰ ਵਿਚ ਭਾਰਤ ਚੀਨ ਨਾਲੋਂ ਪਿੱਛੇ-ਪ੍ਰਧਾਨ ਮੰਤਰੀ
*ਆਬਾਦੀ ਦੇ ਮਾਮਲੇ ਵਿਚ ਜਲਦੀ ਹੀ ਅੱਗੇ ਨਿਕਲਣ ਦੀ ਆਸ ਹੈ

-ਛੋਟੀ ਬਹੂ ਦੀ ਜ਼ਿੰਦਗ਼ੀ ਨੂੰ ਨਰਕ ਬਣਾਵੇਗਾ ਅਭਿਨੇਤਾ ਅਮਨ ਵਰਮਾ?
*ਫਿਰ ਵੱਡੀ ਬਹੂ ਨੂੰ ਕਹੇਗਾ, ਕਿਸੇ ਤੋਂ ਨਾ ਡਰਨਾ

-ਪੰਜਾਬ ਚੋਣਾਂ ਅਤੇ ਲੀਡਰਾਂ ਦੀ ਇਲਜ਼ਾਮਬਾਜ਼ੀ
*ਪੰਜ ਸਾਲ ਦੀ ਕੁਰਸੀ ਵਾਸਤੇ ਗਾਲ੍ਹਾਂ ਮਹਿੰਗੀਆਂ ਤਾਂ ਨਹੀਂ ਭਾਜੀ

-ਫਲਸਤੀਨ ਨੂੰ ਯੂਨੈਸਕੋ ‘ਚ ਸੰਪੂਰਨ ਮੈਂਬਰਸਿਪ ਦੇਣ ਦੇ ਹੱਕ ਵਿਚ ਮਿਲਿਆ ਬਹੁਮਤ
*ਪਰ ਅਮਰੀਕਾ ਨੇ ਇਸ ਵੱਲੋਂ ਖਿੱਚਿਆ ਆਪਣਾ ਹੱਥ

-ਕੱਬਡੀ ਕੱਪ ਦੇ ਉਦਘਾਟਨ ਨੇ ਰਾਸ਼ਟਰ ਮੰਡਲ ਖੇਡਾਂ ਦੇ ਉਦਘਾਟਨੀ ਸਮਾਗਮ ਨੂੰ ਪਾਇਆ ਫਿੱਕਾ
*ਜਿਸ ਕਰਕੇ ਬਾਲੀਵੁੱਡ ਕਲਾਕਾਰਾਂ ਨੂੰ ਕਰੋੜਾਂ ਰੁਪਿਆ ਦਿੱਤਾ

-ਯੂਥ ਅਕਾਲੀ ਦਲ(ਅ) ਨੇ ਵੱਡੇ ਪੱਧਰ ਉੱਤੇ ਕਾਲਜਾਂ, ਸਕੂਲਾਂ ਅਤੇ ਯੂਨੀਵਰਸਿਟੀਆਂ ਦੇ ਅਹੁਦੇਦਾਰਾਂ ਦੀ ਸਥਾਪਨਾ ਕੀਤੀ
*ਕਿਵੇਂ ਲੱਗਦਾ ਹੋਵੇਗਾ ਜਦੋਂ ਇਕ ਯੂਥ ਨੇ ਪੰਜਾਹ ਸਾਲਾਂ ਦੇ ਪ੍ਰਿੰਸੀਪਲ ਦੀ ਸਥਾਪਨਾ ਕੀਤੀ ਹੋਵੇਗੀ।

-ਪੰਜਾਬੀ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਵਲੋਂ ਅੰਗ੍ਰੇਜ਼ੀ ਪੰਜਾਬੀ ਖੇਤੀਬਾੜੀ ਸ਼ਬਦਾਵਲੀ ਕੋਸ਼ ਤਿਆਰ ਕਰਵਾਇਆ ਜਾਵੇਗਾ-ਡਾ:ਢਿਲੋਂ
*ਜਿਸ ਦਾ ਤਰਜਮਾ ਕਰਨ ਲਈ ਇਕ ਚੀਨੀ ਨੂੰ ਚੀਨੀ ਸਮਾਨ ਵਾਂਗ ਚੀਨ ਤੋਂ ਮੰਗਵਾਇਆ ਜਾਵੇਗਾ

-ਬਠਿੰਡਾ ਵਾਸੀਆਂ ਦੇ ਦਿਲਾਂ ਵਿਚ ਅਮਿੱਟ ਛਾਪ ਛੱਡ ਗਿਆ ਵਿਸ਼ਵ ਕੱਪ ਦਾ ਆਗਾਜ਼
*ਕਰੋੜਾਂ ਰੁਪਏ ਦੇਕੇ ਪੰਦਰਾਂ ਮਿੰਟਾਂ ਲਈ ਸੁਣਨ ਨੂੰ ਮਿਲੀ ਸ਼ਾਹਰੁੱਖ ਦੀ ਆਵਾਜ਼

-ਮੈਂ ਅੰਨਾ ਦਾ ਮੌਨਵਰਤ ਤੁੜਵਾ ਦੇਵਾਂਗੀ-ਰਾਖੀ ਸਾਵੰਤ
*ਜਦੋਂ ਇਹ ਭੜਕੀਲੇ ਕਪੜੇ ਪਾਕੇ ਅੰਨਾ ਦੀ ਤਪਸਿਆ ਭੰਗ ਕਰਨ ਲਈ ਜਾਵੇਗੀ

-ਆਹ ਸ਼ਾਹਰੁੱਖ ਨੂੰ ਸੱਦਣਾ ਸਮਝ ਨਹੀਂ ਆਇਆ?
*ਸਿਆਸਤ ਨੂੰ ਸਮਝ। ਲੱਗਦੈ ਤੂੰ ਤਾਂ ਸੱਠਿਆ ਗਿਐਂ ਤਾਇਆ

-’ਤੇ ਰਾਵਣ ਅਜੇ ਵੀ ਜਿੰਦਾ ਹੈ…
*ਸਿਰਫ਼ ਸ਼ਕਲ ਬਦਲ ਗਈ ਹੈ

-ਪੂਨਮ ਪਾਂਡੇ ਦੇ ‘ਮਿਰਰ ਐਕਟ’ ਨੂੰ ਯੂ-ਟਿਊਬ ਨੇ ਕੀਤਾ ਬੈਨ
*ਜਿਨ੍ਹਾਂ ਵੇਖ ਲਿਆ ਉਨ੍ਹਾਂ ਦੀਆਂ ਰਾਤਾਂ ਦੀ ਉਡੀ ਨੀਂਦ-ਦਿਨਾਂ ਦਾ ਉਡਿਆ ਚੈਨ

-ਕੇਜਰੀਵਾਲ ਨੇ ਦਾਨ ‘ਚ ਮਿਲੇ 80 ਲੱਖ ਰੁਪੈ ਆਪਣੇ ਨਿਜੀ ਟਰਸਟ ਵਿਚ ਜਮ੍ਹਾਂ ਕਰਵਾਏ-ਅਗਨੀਵੇਸ਼
*ਜਿੰਨਾ ਚਿਰ ਪੈਸਾ ਸਾਹਮਣੇ ਨਹੀਂ ਦਿਸਦਾ ਓਨਾਂ ਚਿਰ ਹੀ ਲੋਕੀਂ ਭ੍ਰਿਸ਼ਟ ਨਹੀਂ ਹੁੰਦੇ

-ਚੀਨ, ਪਾਕਿਸਤਾਨ ‘ਚ ਸੈਨਿਕ ਅੱਡਾ ਬਣਾਉਣ ਦਾ ਚਾਹਵਾਨ
*ਇਹ ਤਾਂ ਹੈਰਾਨੀ ਵਾਲੀ ਗੱਲ ਹੈ ਪਾਕਿਸਤਾਨ ਇਕ ਮਿਆਨ ਵਿਚ ਅਮਰੀਕਾ-ਚੀਨ ਦੋ ਤਲਵਾਰਾਂ ਰੱਖਣ ਦੀ ਕੋਸਿ਼ਸ਼ ਕਰ ਰਿਹੈ

-ਅਡਵਾਨੀ ਦੀ ਰੱਥ ਯਾਤਰਾ ਦੀ ਕਵਰੇਜ਼ ਲਈ ਭਾਜਪਾ ਨੇ ਪੱਤਰਕਾਰਾਂ ਨੂੰ ਪੈਸੇ ਵੰਡੇ
*ਅਡਵਾਨੀ ਜੀ ਵੀ ਲੀਡਰ ਨੇ ਬੜੇ ਹੀ ਹੰਢੇ

-

-ਮੋਦੀ ਦੇ ਵਰਤ ਨੂੰ ਡਰਾਮਾ ਕਰਾਰ ਦਿੱਤਾ ਜਾ ਰਿਹਾ ਹੈ
*ਭਾਜਪਾ-ਅਕਾਲੀਆਂ ਦੀਆਂ ਨਿਗਾਹਾਂ ‘ਚ ਹੰਗਾਮਾ ਕਰਾਰ ਦਿੱਤਾ ਜਾ ਰਿਹੈ

-ਫਲਸਤੀਨ ਨੂੰ ਸੰਪੂਰਨ ਰਾਸ਼ਟਰ ਦਾ ਦਰਜਾ ਦਿੱਤਾ ਜਾਵੇ
*ਇਸਰਾਈਲ ਤੇ ਅਮਰੀਕਾ ਮੰਨ ਜਾਣ ਫਿਰ ਦੇ ਦੇਵਾਂਗੇ

-ਸੰਗਤਾਂ ਅਖੌਤੀ ਆਗੂਆਂ ਨੂੰ ਮੂੰਹ-ਤੋੜ ਜਵਾਬ ਦੇਣਗੀਆਂ
*ਬਈ ਇਹ ਕਲਯੁੱਗ ਹੈ, ਬਿਆਨ ਸੋਚਕੇ ਦਿਆ ਕਰੋ

-ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਨੂੰ ਮਿਲਣਾ ਗੁਨਾਹ ਨਹੀਂ ਹੈ-ਸਰਨਾ
*ਸਿੱਖ ਹਿਤਾਂ ਲਈ ਮਿਲਣਾ ਗੁਨਾਹ ਨਹੀਂ ਹੈ, ਸਿਰਫ਼ ਚਾਹ ਪੀਕੇ ਪਰਤ ਆਉਣਾ ਗੁਨਾਹ ਹੈ

-ਸ਼੍ਰੋਮਣੀ ਖਾਲਸਾ ਪੰਚਾਇਤ ਵੱਲੋਂ ਪੰਥਕ ਮੋਰਚੇ ਦੇ ਹੱਕ ਵਿਚ ਸਮਾਗਮ ਕੀਤਾ ਗਿਆ
*ਸਟੇਜ ‘ਤੇ ਬੈਠੇ ਲੀਡਰਾਂ ਵਲੋਂ ਚਾਹ ਨਾਲ ਸੋਡਾ ਪੀਤਾ ਗਿਆ

-ਆਲ ਇੰਡੀਆ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਸ਼ਹੀਦਾਂ ਦੀ ਮਹਾਨ ਜਥੇਬੰਦੀ-ਬਾਬਾ ਦਾਦੂਵਾਲ
*ਕਿਹੜੀ ਵਾਲੀ ਫੈਡਰੇਸ਼ਨ?

-ਮੇਨਕਾ ਬਣ ਕੇ ਬਾਬੇ ਰਾਮਦੇਵ ਦੀ ਤਪਸਿਆ ਭੰਗ ਕਰ ਦੇਵਾਂਗੀ-ਰਾਖੀ
*ਇਨ੍ਹਾਂ ਬਾਬਿਆਂ ਨੇ ਕਈ ਮੇਨਕਾਵਾਂ ਦੀ ਤੱਪਸਿਆ ਭੰਗ ਕੀਤੀ ਹੋਣੀ ਐਂ

-ਭਾਰਤ ਵਿੱਚ ਹਿੰਦੂ ਅੱਤਵਾਦ ਵੱਧ ਰਿਹਾ ਹੈ-ਅਮਰੀਕਾ
*ਸਾਨੂੰ ਤਾਂ ’84 ਤੋਂ ਬਾਅਦ ਹੀ ਪਤਾ ਚਲ ਗਿਆ ਸੀ।

-ਪੈਰਿਸ ਦੇ ਜੰਮਪਲ ਸਿੰਗਰ ਸਤ ਸੰਧੂ ਦੇ ਪੰਜਾਬੀ ਗਾਣੇ ਦੀ ਵੀਡੀਓ ਰਲੀਜ਼
*ਫਿਰ ਇਹਨੂੰ ਚਲਾਉਣ ਲਈ ਲਾ ਦਿਓ ਪੂਰਾ ਜ਼ੋਰ ਪਲੀਜ਼

-ਕੀ ਧਰਮ ਵਿਗਿਆਨ ਤੋਂ ਉੱਪਰ ਹੈ?
*ਇਸ ਸਬੰਧੀ ਹਾਂ ਹੀ ਸਾਡਾ ਉੱਤਰ ਹੈ

-ਸਾਨੂੰ ਵੀ ਗੁਰਦੁਆਰਾ ਈ ਪਵਾ ਦੇਅ ਤਾਇਆ
*ਸੰਗਤਾਂ ਨੂੰ ਵੰਡਾਂਗੇ ਕੜਾਹ ਤੇ ਆਪ ਛਕਾਂਗੇ ਮਾਇਆ

-ਸਹਿਜਧਾਰੀ ਸਿੱਖ ਵੋਟਰਾਂ ਦਾ ਮੁੱਦਾ
*ਸਿਆਸਤਦਾਨਾਂ ਵਲੋਂ ਖੇਡੀ ਜਾ ਰਹੀ ਖੇਡ

-ਗੁਰਦੁਆਰਾ ਐਕਟ 1925 ਵਿਚ ਸੋਧਾਂ ਦੀ ਲੋੜ
*ਜੇ ਸੋਧਾਂ ਕਰ ਲਈਆਂ ਤਾਂ ਜੇਬਾਂ ਕਿਵੇਂ ਭਰਾਂਗੇ ਹੋਰ-ਹੋਰ

-ਸਿਆਸੀ ‘ਖੇਡਾਂ’ ਤੋਂ ਕਦੋਂ ਆਜ਼ਾਦ ਹੋਣਗੇ ਖਿਡਾਰੀ
*ਜਦੋਂ ਸਿਆਸਤ ਦੀ ਖ਼ਤਮ ਹੋ ਜਾਵੇਗੀ ਬਿਮਾਰੀ

-ਬਸੀ ਪਠਾਣਾਂ ਦੇ ਵਾਰਡ ਨੰ:12,13,4 ਦੇ ਵੋਟਰਾਂ ਨੇ ਮਾਨ ਨੂੰ ਲੱਡੂਆਂ ਨਾਲ ਤੋਲਕੇ ਚੋਣ ਪ੍ਰਚਾਰ ਸਿਖਰਾਂ ‘ਤੇ ਲਿਆਂਦਾ
*ਜੇ ਨੋਟਾਂ ਨਾਲ ਤੋਲਦੇ ਤਾਂ ਹੋਰ ਵੀ ਸਿਖਰਾਂ ‘ਤੇ ਆ ਜਾਣਾ ਸੀ।

-ਅਮਰ ਸਿੰਘ ਕੇਸ ‘ਚ ਭਾਜਪਾ ਹੋਈ ਸ਼ਰਮਸਾਰ
*ਇਸੇ ਨੂੰ ਤਾਂ ਕਹਿੰਦੇ ਨੇ ਰਾਜਨੀਤੀ ਦੀ ਮਾਰ

-ਅਮਰ ਸਿੰਘ ਨੇ ਮੂੰਹ ਖੋਲ੍ਹਿਆ ਤਾਂ ਕਈ ਫਸਣਗੇ-ਜੈਪ੍ਰਦਾ
*ਇਹ ਅਮਰ ਸਿੰਘ ਦੀ ਵੱਡੀ ਰਾਜ਼ਦਾਰ ਲੱਗਦੀ ਐ

-ਅਨੰਦ ਮੈਰਿਜ ਬਿੱਲ ਨੂੰ ਜਲਦੀ ਹੀ ਐਕਟ ਦਾ ਰੂਪ ਦੇ ਦਿੱਤਾ ਜਾਵੇਗਾ-ਕਾਨੂੰਨ ਮੰਤਰੀ
*64 ਸਾਲਾਂ ਬਾਅਦ ਹੀ ਸਹੀ ਭਾਵੇਂ ਬਿਆਨ ਵਿਚ ਹੀ ਮੰਨੇ

-ਯੂਰਪ ਦੇ ਸਿੱਖ ਆਗੂਆਂ ਵੱਲੋਂ ਰਹਿਤ ਰਹਿਣੀ ਵਾਲੇ ਪੰਥ ਦਰਦੀ ਗੁਰਸਿੱਖ ਉਮੀਦਵਾਰਾਂ ਨੂੰ ਸ਼੍ਰੋਮਣੀ ਕਮੇਟੀ ਮੈਂਬਰ ਚੁਣਨ ਦੀ ਅਪੀਲ
*ਜਿੰਨੀਆਂ ਮਰਜ਼ੀ ਅਪੀਲਾਂ ਕਰੀ ਜਾਵੋ, ਚਲਣੇ ਤਾਂ ਮੂੰਹ ਮੁਲਾਹਜੇ ਹੀ ਨੇ।