ਨਵੀਂ ਦਿੱਲੀ, (ਮਨਪ੍ਰੀਤ ਸਿੰਘ ਖਾਲਸਾ)– ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਦੇ ਮੁਖੀ ਪਰਮਜੀਤ ਸਿੰਘ ਸਰਨਾ ਦੀ ਅਗਵਾਈ ਵਿੱਚ ਇੱਕ ਪਹਿਲਕਦਮੀ ਕਰਦੇ ਹੋਏ ਕਈ ਭਾਈਚਾਰਕ ਕਾਰਕੁੰਨਾਂ, ਗੈਰ-ਲਾਭਕਾਰੀ ਸੰਸਥਾਵਾਂ ਅਤੇ ਪਾਰਟੀ ਦੇ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਮੈਂਬਰਾਂ ਨੇ 27 ਵਿਸਥਾਪਿਤ ਸਿੱਖ ਅਫਗਾਨ ਪਰਿਵਾਰਾਂ ਲਈ ਸਮੂਹਿਕ ਤੌਰ ‘ਤੇ 30,000 ਰੁਪਏ ਦਾ ਯੋਗਦਾਨ ਪਾਇਆ ਹੈ।
ਸ. ਸਰਨਾ ਨੇ ਮੀਡੀਆ ਨੂੰ ਦੱਸਿਆ ਕਿ 27 ਸਿੱਖ ਅਫਗਾਨ ਪਰਿਵਾਰਾਂ ਜੋ ਕਿ ਯੁੱਧਗ੍ਰਸਤ ਦੇਸ਼ ਵਿੱਚ ਤਾਲਿਬਾਨ ਸ਼ਾਸਨ ਅਧੀਨ ਧਾਰਮਿਕ ਘੱਟ ਗਿਣਤੀਆਂ ਦੇ ਸੰਭਾਵੀ ਅੱਤਿਆਚਾਰ ਕਾਰਨ ਨਵੀਂ ਦਿੱਲੀ ਆ ਗਏ ਸਨ, ਨੂੰ ਭਾਰਤ ਵਿੱਚ ਆਪਣਾ ਜੀਵਨ ਨਵੇਂ ਸਿਰੇ ਤੋਂ ਸ਼ੁਰੂ ਕਰਨ ਦੇ ਯੋਗ ਹੋਣ ਲਈ ਵਿੱਤੀ ਮਦਦ ਦੀ ਲੋੜ ਹੈ । “ਦਿ ਯੂਨਾਈਟਿਡ ਸਿੱਖਜ਼, ਸਰਦਾਰ ਦਰਸ਼ਨ ਸਿੰਘ ਅਤੇ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਸਾਰੇ ਸ਼੍ਰੋਮਣੀ ਅਕਾਲੀ ਦਲ ਮੈਂਬਰਾਂ ਵਰਗੇ ਕਾਰਕੁਨਾਂ ਨੇ ਹੱਥ ਮਿਲਾਇਆ ਅਤੇ 27 ਸਿੱਖ ਅਫਗਾਨ ਪਰਿਵਾਰਾਂ ਵਿੱਚੋਂ ਹਰੇਕ ਨੂੰ ਦਿੱਲੀ ਵਿੱਚ ਕੁਸ਼ਲ ਕਾਰੋਬਾਰ ਸ਼ੁਰੂ ਕਰਨ ਦੇ ਯੋਗ ਬਣਾਉਣ ਲਈ ਸਮੂਹਿਕ ਤੌਰ ‘ਤੇ 30,000 ਰੁਪਏ ਦਾ ਯੋਗਦਾਨ ਪਾਇਆ। ਉਹਨਾਂ ਅਨੁਸਾਰ ਜੇਕਰ ਉਜਾੜੇ ਗਏ ਸਿੱਖ ਅਫਗਾਨਾਂ ਨੂੰ ਭਾਰਤ ਵਿੱਚ ਮੁੜ ਤੋਂ ਆਪਣਾ ਜੀਵਨ ਬਤੀਤ ਕਰਨ ਲਈ ਕਿਸੇ ਹੋਰ ਸਹਾਇਤਾ ਦੀ ਲੋੜ ਹੈ ਤਾਂ ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਉਹਨਾਂ ਦੇ ਨਾਲ ਡੱਟ ਕੇ ਖੜਾ ਹੈ।