ਮੇਰੇ ਦੁੱਖ ਨੇ ਮੇਰੇ ਨਾਲ ਹੀ ਜਾਣਾ,
ਇੱਕ ਦਿਨ ਗ਼ਮ ਦੀ ਮੈਂ ਸੂਲੀ ਚੜ ਜਾਣਾ ।
ਮੈਥੋਂ ਖੁਸ਼ੀਆਂ ਸਭੇ ਐਸੀਆਂ ਰੁੱਠੀਆਂ,
ਮੈਨੂੰ ਹਾਸਿਆਂ ਨੇ ਮੁੜ ਗਲ ਨਹੀਂ ਲਾਣਾ ।
ਇੱਕ ਦਾਵਤ ਹੰਝੂਆਂ ਨੇ ਹੈ ਸਜਾਈ,
ਕੁਝ ਪੀੜਾਂ ਦਿਲ ਦਾ ਮਾਸ ਹੈ ਖਾਣਾ ।
ਕਿੰਝ ਰੋਵਾਂ ਮੈਂ ਬੁੱਲ ਚਿੱਥ-ਚਿੱਥ ਕੇ,
ਮੈਨੂੰ ਮੌਤ ਨੇ ਬੱਚਿਆਂ ਵਾਂਗ ਵਰਾਣਾ ।
ਮੈਂ ਜਾਗ ਨਾ ਜਾਵਾਂ ਕੱਚੀ ਨੀਂਦੇ,
ਮੈਨੂੰ ਸਿਵੇ ਨੇ ਬੁੱਕਲ਼ ਵਿੱਚ ਸੁਆਣਾ ।
ਮੇਰੇ ਗੀਤ ਗੂੰਜਣੇ ਵਿੱਚ ਰਲ ਹਵਾਵਾਂ,
ਇਨਾਂ ਨੂੰ ਮੁੜ ਕਿਸੇ ਬੁੱਲੀਂ ਨਹੀਂ ਲਾਣਾ ।
ਮੇਰੇ ਦੁੱਖ ਨੇ ਮੇਰੇ ਨਾਲ ਹੀ ਜਾਣਾ,
ਇੱਕ ਦਿਨ ਗ਼ਮ ਦੀ ਮੈਂ ਸੂਲੀ ਚੜ ਜਾਣਾ ।